Daniya, Rusiyaya qarşı 19-cu məhdudiyyətlər paketinin bir hissəsi olaraq kriptovalyuta əməliyyatlarından əldə olunan gəlirlərin istifadəsinə məhdudiyyətlər tətbiq etmək istəyir.

Tvit.az xəbər verir ki, Politico Danimarkanın hazırladığı və 29–30 avqustda Kopenhagendə keçiriləcək Avropa İttifaqı ölkələrinin xarici işlər nazirlərinin qeyri-rəsmi görüşü üçün nəzərdə tutulmuş sənədə istinadla məlumat yayıb.

Danimarka həmçinin “Rusiyanın neft və qaz ixracından əldə etdiyi gəlirlərə qarşı məhdudiyyətlər” təklif edir, lakin qəzet bu sanksiyalarla bağlı əlavə təfərrüatlar gətirmir. Bundan başqa, XİN rəhbərləri “indiyədək tətbiq edilməmiş bir aləti müzakirə edəcəklər ki, bu da Aİ-yə daxil olmayan, lakin sanksiyaların dolanılması riskinin yüksək olduğu ölkələrə ixracı qadağan edə bilər”.

Nəşrin qeyd etdiyinə görə, bu, yalnız müzakirələrin aparılacağı qeyri-rəsmi görüş olacaq və konkret addımların atılması gözlənilmir. Avropa Parlamentinin Xarici İşlər Komitəsinin rəhbəri David Makallister vurğulayıb ki, bu görüş sadəcə olaraq “Avropanın təhlükəsizlik və müdafiə gündəminə qarşıdakı aylar üçün ton verəcək”.

Bundan əvvəl Avropa Komissiyasının sədri Ursula fon der Lyayen Rusiyaya qarşı 19-cu sanksiyalar paketini “sentyabrın əvvəlində” elan edəcəyini açıqlamışdı.