Apple-ın kamera ilə təchiz olunmuş AirPods modelləri üzərində çalışdığı artıq bir müddətdir məlumdur. İndi isə şirkətin uzun müddətdir hazırladığı bu məhsulla bağlı yeni detallar ortaya çıxıb.

Tvit.az xəbər verir ki, məlumatı Apple məhsulları ilə bağlı etibarlı proqnozları ilə tanınan Bloomberg-in redaktoru Mark Gurman paylaşıb.

Gurmanın sözlərinə görə, kameralı AirPods modellərinin satış tarixi əvvəllər gözləniləndən daha gec hesab edilsə də, son məlumatlar cihazın artıq gələn ay təqdim oluna biləcəyini göstərir.

Bildirilir ki, Apple-ın süni intellekt yönümlü geyilə bilən cihaz strategiyasının bir hissəsi olan və B798 kod adı ilə hazırlanan modelin 2026-cı ildən 2027-ci ilə təxirə salındığı iddia edilirdi. Lakin Gurman şirkətin paralel olaraq B790 kod adlı ikinci layihə üzərində də işlədiyini açıqlayıb. Apple-ın eyni məhsulun müxtəlif versiyalarını paralel inkişaf etdirməsi şirkət üçün adi praktikadır.

Məlumata görə, B790 modeli kütləvi istehsala daha yaxın mərhələdədir və bu ilin sonunadək satışa çıxarıla biləcək namizədlər sırasındadır. Hətta bu modelə aid kod izlərinin iOS 27-nin ikinci tərtibatçı beta versiyasında aşkar edildiyi bildirilir. Bununla belə, B790 ilə daha inkişaf etmiş hesab edilən B798 modeli arasındakı texniki fərqlər hələ açıqlanmayıb.

Qeyd olunur ki, AirPods modellərində istifadə ediləcək kameralar foto və ya video çəkmək üçün nəzərdə tutulmayıb. Onların əsas funksiyası Siri-yə istifadəçinin ətraf mühitini real vaxt rejimində analiz etmək və Visual Intelligence imkanları ilə inteqrasiyanı təmin etmək olacaq.

Yeni modellərin hazırkı AirPods Pro seriyasından daha yüksək qiymətə satışa çıxarılacağı və AirPods Ultra adı altında təqdim oluna biləcəyi gözlənilir.

Aysel Şirinova